Leni Robredo

una pa lang pumutok ang pangalang leni robredo noong agosto 2012, alam ko nang magiging malaki ang kanyang papel sa pulitikang pambansa. namatay ang kanyang asawang si jesse robredo at dahil nga rito'y natuon ang atensyon sa simpleng maybahay na ito. sumunod dito ay pagkahirang sa kanya bilang tagapamuno ng partido liberal sa camarines sur. noong 2013, inilampaso niya si nelly villafuerte, matriarch ng makapangyarihang pamilya villafuerte, sa pagkakongresista ng ikatlong distrito ng lalawigan. mula rito, buong giting itong nagtrabaho at nagtulak ng mga mahahalagang panukalang batas. kasama rito ang freedom of information bill, full disclosure act, people empowerment, tax incentives management and transparency act, anti-dynasty bill, healthy beverage options act, at marami pang iba. bukod pa ito sa pagsusulong ng usapin tungkol sa pagsugpo sa kahirapan at pagkakaroon ng transparency sa bawat kontratang papasukin ng anumang ahensya ng gobyerno. ang lahat ng ito ay kanyang ginampanan habang mag-isang itinataguyod ang kanyang tatlong anak sa matuwid at simpleng pamumuhay. nagba-bus lamang ito pauwi sa naga mula sa maynila tuwing katapusan ng buong linggong pagtatrabaho sa kongreso. hindi ito nasilaw sa marangyang gawi ng karamihan sa kabarong mambabatas. kaya naman, nang makita ko siya sa event ng rappler, batid ko agad na iboboto ko ito sakaling tumakbo ito sa mas mataas na posisyon.

 

hindi napapayag ng mga taga-liberal na maging bise presidente ni mar roxas si grace poe dahil pinili nitong magpabola kay chiz escudero at mga kakampi nito. nagkumahog ang mga makadilaw upang may maitambal kay roxas at kanilang napili ang kongresista mula sa camarines sur. di sigurado si leni. wala siyang salapi at makinarya at masyado pa raw maaga para tumakbo sa pambansang posisyon. kapag iniwan niya ang kanyang puwesto sa kongreso, tiyak din babalik ito sa kamay ng dinastiyang villfuerte (hindi naman ito nangyari). at siyempre, nangungulelat siya sa survey. ni wala ito sa top 10. kaya naman mauunawaan ang kanyang agam-agam. pero sa taimtim na dasal ay tinanggap naman ni leni ang hamon ng pagtakbo bilang pangalawang pangulo. kabi-kabila ang batikos sa kanya ng mga maka-marcos. kesyo tuta ito ni noynoy aquino at roxas, na wala raw itong alam sa pamamalakad, na isa lamang itong biyudang tulad ni cory aquino at marami pang iba.

sa gitna ng mga debate, wala naman talagang maipukol kay leni. paano mo naman kasi pipintasan ang isang abugado ng mahihirap at inaapi at dumarayo pa sa liblib na mga pook upang tulungan ang mga nasa laylayan ng lipunan? paanong pabubulaanan ng kanyang kalaban ang kanyang rekord tungkol sa pagsupil sa mga mapang-abuso at pakikipaglaban sa mga sinisiil? paano mong titirahin ang walang luho nitong paninilbihan sa bayan o ang kanyang tahimik ngunit maprinsipyong pagkatao? paano babarenuhin ang mabini ngunit matatag nitong tindig? di tulad ni chiz, di ito isang pulitikal na paru-parong kung saan-saan dumarapo depende sa ihip ng hangin. di tulad ni alan peter cayetano at antonio trillanes, di kinailangan ni leni na maging kontrobersyal at palagiang umapir sa midya upang masabing may ginagawa. di tulad ni gringo honasan, wala itong kailangang ipaliwanag sa kanyang nakaraan. at lalong di tulad ni bongbong marcos, walang bahid ng katiwalian si leni. wala itong nais kamkamin, bawiin o paghigantihan. wala itong pangalang kailangan niyang linisin sa pamamagitan ng pag-akyat sa pangalawang pinakamataas na puwesto sa bansa. walang nais si leni kundi maglingkod sa bayan… walang labis, walang kulang.

sa gitna ng bilangan, pinaugong ng mga troll ni marcos na may dayaang nangyari dahil sa pagpapalit ng smartmatic ng code para itama ang mga apelyidong may ñ. lumalamang kasi si marcos sa unang bugso ng quick count ng ppcrv. ngunit sa pangatlong araw kung kailan nagsipasok na ang mga boto mula sa balwarte ni leni tulad ng kabikulan, kabisayaan at malaking bahagi ng mindanao, naungusan na ni gng. robredo ang anak ni imelda. sa pagsasara ng bilangan ng ppcrv, lamang si leni ng higit 220,000 boto kay bongbong. tugma sa inaasahan, di tumigil ang mga kampon ni marcos at si bongbong mismo sa pagsasabing may nangyaring dayaan. ang rurok nito ay ang paghaharap umano ng 3 pekeng saksing mula sa quezon na may pandarayang ginawa sa kanilang lugar. lahat ng ito upang pigilan ang pagproklama kay leni bilang halal na pangalawang pangulo. ngunit di nagtagumpay ang mga talusirang makamarcos. tinalo ni leni si bongbong sa margin na 263,473 boto at uupo ito bilang bise presidente sa hunyo 30. sinabi niya sa dalawang debate ng mga kandidato: the last man standing is a woman. at ito nga ang nangyari.

bagamat di naging mabisa ang huling punyagi ng mga taga-LP para kay roxas, pumanig ang maraming undecided kay robredo. bukod sa kanyang taal na tagasuportang tulad ko, marami ang sa huling pagkakataon ay bumoto para kay leni. ang higit na bahagdan ng botong ito ay mula sa mga may malilinaw na pag-iisip na di na dapat na muling makabalik ang mga marcos sa poder. ang 14,418,817 botong nakuha ni leni ay para sa tunay na paglilingkod, 'yung serbisyong walang hinihintay na kapalit. ito ang serbisyong umiimbita sa mga mamamayan upang makilahok at makisangkot sa mga usapin… hindi upang mangalap ng boto at kakampi para sa susunod na eleksyon, kundi dahil ito ang nararapat. dahil sa paglalahukan at pagtutulungan, mas nagiging epektibo ang bawat galaw ng gobyerno, tulad ng nakita natin sa naga city.

tila walang balak ang papasok na presidenteng si duterte na bigyang puwang si leni sa kanyang gabinete. mas pinapaboran kasi ng "hulog ng langit" na si duterte na di masaktan ang isa sa kanyang mga pinansyer – bongbong marcos. halata naman ang kanilang sabwatan sa umpisa pa lang. kung kay duterte nga naman tatambal si marcos, mapapansin ng karamihan ang kanilang tunay na plano. kaya kailangan ng mga dummy na tulad ni miriam santiago at cayetano. sinabi rin naman ni duterte na kailangan niyang magbayad ng utang na loob sa mga tumulong sa kanya kaya di isasali si leni sa pamamalakad ng anumang ahensya. ok lang ito. di naman nito malilimitahan ang kakayahan ni leni na isulong ang kanyang mga plano. di kawalan ang kakitiran ng pag-iisip ng uupong pangulo sa paggawa ng mabuti, lalo na nga't tunay na mabuting tao ang gagawa nito sa katauhan ni VP leni.

ang mahalaga ay isang marangal, malinis at mabuting tao ang uupo bilang pangalawang pangulo. ngayon pa lang, kung kailan sinabi niyang di siya mag-oopisina sa coconut palace dahil sa laki ng gastos dito, damang-dama na ng marami kung anong klaseng panunungkulan ang aasahan kay VP leni – tapat, mapagpakumbaba, di magarbo, simple, taos-puso, tunay na serbisyo, makatao, makadiyos, makakalikasan at tunay na makabansa. 

mabuhay ka, VP leni robredo!