Taipei

I had always known the sky are full of mysteries - but not until now had I realized how full of them the earth was. 

- Miss Peregrine's Home for Peculiar Children


Taipei, Taiwan
November 2016.

hiyas

diyamante o anumang mamahaling bato o mineral. ito ang isa sa pinakamatatagal nang pinag-aawayan ng mga tao sa kasaysayan ng sangsinukob. ito at mg bagay na pinalamutian ng mga ito ang unang isinusukbit sa mga nakawan, digmaan at maraming sigalot sa pagitan ng mga tao. nakakabit sa mga ito ang kapangyarihan, karangyaan, kayamanan, kapalaluan at karangalan. 'pag nabanggit na ang mamahaling batong gaya ng diyamante, sapiro, rubi, opal o ang mga presyosong metal gaya ng ginto at pilak, umiigpaw na ang dugo ng marami dahil sa halaga ng mga ito. pinamamana pa ang mga ito sa salinlahing di na mabibilang. ginagamit ang mga ito bilang adorno ng mga karakter na may kinalaman sa relihiyon at upang bigyang ringal ang mga hari't reyna ng mga monarkiya. maging sa sinaunang pilipinas, may bigat, bukod sa literal na onsa o kilo, ang mga ito sa buhay ng sangkatauhan.

kaya naman sinusuong ninuman ang anumang unos, baha o anumang kalamidad makamit lamang ang anumang hiyas. tatawirin ang anumang mapanganib na sangandaan upang makaumit maski ng maliit na butil ng mga ito. sasagasa sa anumang bulto ng mga tao, masayaran lang ang mga palad ng presyosong bato o metal. buong tiyagang maghihintay sa pagsapit ng takdang panahon upang mahinog ang mga ito. lulubog sa anumang kumunoy kung ito lamang ang paraan upang makapagmina nito. tatawagin ang lahat ng santo upang humingi ng katakut-takot na buwenas at biyaya, nang sa gayon, makaani ng nakakubling uslak. lulunukin ang anumang dangal sa sarili upang matantusan lamang ng mga ito. kesehodang gumastos pa ng higit sa nararapat dahil ang iniisip ay ang balik nitong kaperahan sa sandaling tumaas pang lalo ang presyo sa merkado. handa ring isakripisyo ang buhay kung kinakailangan dahil di matatawaran ang pagkakamal ng mga mamahaling hiyas.

sa huli, di maikakaila ang halaga ng anumang hiyas sa tao. oo nga't may mga taong di mahilig sa anumang alahas, pero ang halina ng mga ito ay tila isang unibersal na nang-aakot sa kaloob-loobang kalamnan ng mga kaapu-apuhan ni adan at eba… "angkinin mo ako, mag-may-ari ka ng isa sa amin, gastusin mo ang pera mo sa isang piraso ng alahas at ikaw ay lulukuban ng ibayong ligaya".

wala akong ni isa mang piraso ng anumang mamagaling bato. isang singsing at kuwintas (nawala pa ang pendant), pero ako'y masaya. 

ikaw, anong hiyas mayroon ka?

Asiatique

The wheels on the bus go 'round and 'round all through the town. 
- Yuri Boy

Asiatique, Bangkok
December 2016.

Batanes

Shelves.
Batanes.
Siquijor.
The absence of books.
Because of ebooks.

hugot

limang taon. oo, limang taon tayong magkasama. limang taong puno ng abentura. puno ito ng saya, galak at higit sa lahat, kusa mo itong ibinigay sa akin. di ka naghintay ng anumang kapalit. kaya naman ganoon na lang ang aking galak at pasasalamat nang dumating ka sa aking buhay. hulog ka ng langit, batid ng aking puso't isipan.

dinala mo ako sa ibang daigdig gaya ng sa nat geo at discovery. bikaryong ipinatikim mo sa akin ang mga pinagluluto ng mga tao sa master chef at mga hinurnong cake sa cake boss. inaliw mo ako sa pamamagitan ng mga palabas na panonoorin mo lang upang may ingay sa aking bahay tulad ng maynila, sarap diva at mga balitang paulit-ulit lang sa cnn at aljazeera. tumaas ang aking dugo sa eksaytment dahil sa mga isports – mula sa tennis, volleyball, olimpiyada, badminton at marami pang iba. mataman mo ring pinuno ang aking isipan ng mga impormasyong pangkasaysayan at lalo na sa mga pangyayari sa kasalukuyan. inaliw mo ako sa pamamagitan ng mga pelikulang kahindik-hindik, aksyon, madrama at may komedya rin. binigyang-daan mo ang pagkakakilala ko sa mga karakter ng downton abbey at ilang mga seryeng di ko rin naman nasundan masyado pero nalaman ko ang maliit na anggulo ng mga ito.

higit sa lahat, ikaw ang nagbigay-daan upang maaliw ako sa mga oras na wala namang wawa ang mga bagay-bagay. kinasangkapan mo ang iyong sarili upang ako'y makalimot sa mga suliranin at makatagpo ng panandaliang lamyerda palayo sa mga isyu. ikaw ang aking kasama sa araw-araw na ginawa ng diyos, mula umaga't pagkagising ko, hanggang makaalis ako patungong trabaho at makauwi mula rito. ikaw ang konstant sa aking buhay. sa maikling salita, limang taon mo akong pinaligaya. limang taong walang anumang balik. libre ito, di ko kinailangang magbayad. minahal mo ako nang buong-buo!

ngunit, natapos na ang maliligayang araw na ito. bigla kang nawala. makailang beses kong binalik-balikan ang dati nating tagpuan ngunit wala ka na. tahimik ang paligid at di ka umiimik. noong una, inakala ko pang maysakit ka. di ko kasi alam kung naambunan ka ba nang minsang lumakas ang ulan nang nasa taiwan ako. baka lang kulang sa pitik sabi ko. pero di pala. wala ka na talaga. sabi ni kuya isko, tuluyan ka nang kinitil. tuluyan na ngang hinadlangan ang ating hugpungan. tuluyan na nila tayong pinaghiwalay!

masakit sa akin ang paglisan mong ito. nasanay na kasi ako na lagi kang nandiyan. alam mo 'yung pakiramdam na bigla na lang kinuha ang isa sa mga alagang hayop o bigla na lang inagaw ang iyong bag… ganoon ang pakiramdam ko ngayon. nababalot na tuloy ng nakabibinging katahimikan ang aking tahanan… wala ka na eh. malalim ang mga hugot, mahirap, masakit at malungkot.

o libreng cable tv connection, bakit mo ako iniwan? bakit kailangan nating maghiwalay? bakit kailangan nilang putulin ang kawad? o ang anumang analog na paghahatid ng mahika mula sa iyong mga kable patungo sa aking tv. bakit? o bakit? bakit kailangan itong mangyari? hindi ba maaaring lima pang taon? o kahit isang taon lang. sabi nga ni ogie alcasid:

kailangan kita

ngayon at kailanman

kailangan mong malaman na ikaw lamang

ang tunay kong minamahal

ang tangi kong hiling ay makapiling ka lagi

kailangan kita.

ngunit huli na ang lahat. huli na nang aking mapagtantong binawi ka na sa akin. di na ako maaari pang umapela. kung maaga ko sanang nalaman, may nagawa pa ako. pero wala na. dapat ko na lamang gawin sa puntong ito ay magpasalamat sa alaala, sa iyong pagmamahal, sa iyong kalinga't biyaya, at higit sa lahat… sa mga perang aking natipid (PHP 550 ka rin kada buwan; 6,600 kada taon at; 33,000 sa loob ng 5 taon!!)! kailangan ko nang umiba ng dako, maghanap ng tulad mo at may impit na dasal na sana'y makasumpong ulit ng gaya mo, 'yung di naghihintay ng kapalit… 'yung walang bayad!

magkano nga magpakabit ng sky cable? o may libre ding sky cable?!

Mandalay

The way of the gods were not to be fathomed. 
Where everything baffled us, their ways would be the most beffudling of all. 
- Longitude by Carlos Cortes


Sutaungpyae Paya
Mandalay, Myanmar
December 2016.

sta. cruz

akala'y parang huling dalawang didjit na ng taon ang magiging ending. di kasi umariba ngayong taon na ito. daming kailangang pagtuunan ng pansin, di gaanong naging kaaya-aya ang himpapawid sa pagtuklas ng bagong uslak. at sa unang pagkakataon magmula nang masumpungan ang biyaya ng kasinatiang ito, walang ni isa man lang mula sa bayan ng mga kanal sa chao. magkagayunman, ngislak pa rin naman ang hatid ng taong ito. mantakin mo ba namang pumalo pa rin sa mataas ang total. di nga lang ganoon karami tulad ng 2015, pero di rin naman pahuhuli ang abenturang hatid ng 2016.

bukod sa dekadang hatid ng fuente osmena, may iba pang himpilan ang taong ito. una na riyan ang crispy patang hatid ng tarlac. kaiga-igaya at matayog ang lipad ng saranggola ni pepe. pumalaot din ang camotes. ibang lebel ang tikid, mahahanay sa maraming matatayog na lagayan ng watawat. sumunod ang di gaanong mahusay na ronda sa cebu. nakatatamad ito at tila walang wawa sa uslakan. buti na lang at binawi ito ng alas ng albany. di ito nagpagupo sa kapaguran at buong giting ang paggiling sa ginataang suso na may kasamang malunggay. nagbalik sa san mateo upang makopo ang mga korner. mabilis naman ang sulak at di nataripaan ang sasa pero ok lang din kasi kaaya-aya ang tanawin. akala'y mabobokya dahil sa isyu sa koordinasyon ngunit natuloy din ang majayjay. maigsi ito ngunit di naman maikli ang uswagan at punong-puno ng kangisi-ngising gawain. ang huli ay ang lungsod sa ibabaw ng bundok. mabilisan ito at ni hindi gaanong nakapagprepara. sakto lamang ngunit di na muna uulit.

at balik nga tayo sa sta. cruz. mahirap humindi rito kaya nga shi na ito. kung tutuusin, di ito eksakto. malayo at kadalasan ay di gaanong nakokopo ang dapat malimbag. pero iba ang tipnip sa isang ito. kumbaga ay mayroong malalim na hubungan, masaya ang bawat taripa, karami ng nauuwing gambar at di pumapalya ang dalawang pustanje kada daan. dahil sa mga ito, di naman nakapagtatakang pumangdeset na ito.

parang nais pang tumuklas ng ibang meso bago magpalit ng taon. may panahon pa naman at siyempre bakit naman magpapapigil sa iba't ibang paktoyd kung magdaragdag naman ito ng di matatawarang iskustvo. 

hanggang sa susunod!

lunggati

stickers

sa tuwing darating na lang ang panahong ito, kinokopo mo ang laymlayt. tuwing lalagpas ang undas, lahat ng taong mahilig sa kapihan at kuwentuhan, ikaw ang paksa. 'pag lumapit ka sa kawnter, tatanungin ka kaagad kung nais ka bang makatagpo. sa bawat huntahan, may nagtatanong sa akin kung nag-iipon ba ako ng tulad mo.

gayon na lamang ang bigat ng iyong panghalina… ang mga taong magkaminsan lang nagkakape ay biglang lalaklak ng higit sa isang tasa upang makakuha ng tulad mo. ang mga mahilig naman magkape, dumodoble yata ang lagok para ikaw ay dumami. sa mga gaya ko namang malagihay lang ang relasyon sa kape at tsaa, nahahalina rin akong mag-aya at bumaba upang bumili ng kape… kapalit ng isang tulad mo.

o stickers para sa planner, iba ka talaga! kakaibang alindog mo sa ninuman… hahamakin ang lahat makumpleto ka lamang!

at nakumpleto ko na nga ang akin! CBTL!

Bagan

Dawn in Bagan

Bagan, Nyung Oo,
Myanmar.
Mingalaba!

December 2016.

Beitou

There's a balance in this world, and sometimes forces we don't understand intervene to tip the scales the right way. - Hollow City, Miss Peregrine's Home for Paculiar Children by Ransom Riggs

Beitou Thermal Valley,
Taiper, Taiwan.
November 2016

Diplomat Hotel

"People get too old to care for a place, their family writes them off for one reason or another - it's sad but it happens." - Miss Peregrine's Home for Peculiar Children by Ranson Riggs.

Diplomat Hotel, Baguio City.
July 2016. 

Singapore

"We sailed unready... more for show than for anything else. How they love show, these white men." - Longitude by Carlos Cortes

Singapore, September 2016.

Taipei 101

Elephant mountain they call it. 
Taipei 101, Taipei, Taiwan.
November 2016.

Yangmingshan

Taiwan's very own wonderful Shire... just a few stations away from Taipei Main Station.

Yangmingshan National Park,
Taipei, Taiwan,
November 2016.

Jiufen

"Play with me or I'll break your arm." - Boh, Spirited Away

Jioufen, Taiwan.
November 2016.

hindi bayani si marcos

sa mga sandaling ito, nakahimlay na nga ang mga labi ng diktador na si ferdinand marcos sa libingan ng mga bayani. nanaig na nga ang matagal na nilang balakin, ang tuluyang makabalik at muling maging makapangyarihan sa bansang isinadlak ng diktador sa kahirapan at pinagnakawan ng kanilang pamilya, sampu ng kanilang mga kroni.

tulad ng isang akyat-bahay gang, pailalim at bigla-biglang inilipad ang bangkay mula batac, ilocos norte patungong taguig. inilagak daw ito sa libingang medyo malayo sa ibang mga presidente. ni walang pasabi ang mga ito at sadyang inilihim ang paglilibing dahil daw nais ito ng pamilyang marcos. tulad ng ibang mga inilibing dito, binigyan ito ng 21-gun salute. ngunit di gaya ng sa mga tunay na bayani, patago itong isinakatuparan… gaya rin ng isang magnanakaw. tulad ng isang mandarambong, kumuha ito ng kasakapat sa katauhan ni rodrigo duterte, upang magawa na ang matagal nang naisin nina imelda, imee at bongbong – ang makabalik sa kapangyarihan at muling gawing tanga ang sambayanan. pinilit itong ikubli sa mata ng publiko at pikit-matang sumunod ang mga alipores ni duterte.

pagbabayad ng utang na loob. ito ang puno't dulo nito. kapalit ng pinansyal na tulong sa kampanya at sa kanyang pamilyang loyalista ng mga marcos noon pa man, isa ito sa mga unang ipinag-utos ni duterte. kung nanalo pa si bongbong, kumpleto na ang barter. pero di ito nanalo kaya ang kahilingang ilagak ang matandang marcos ang inuna ni duterte. oo nga't inayunan ng korte suprema ang paglilibing ngunit ang pag-ayon na ito ay sinuma bilang "dahil nais ito ng nakaupong pangulo at ayon sa batas, wala itong nilalabag na anuman". hindi ito mangyayari kung ang nakaupong pangulo ay di hitik ng utang na loob sa mga marcos.

ito ang hindi naisip ng mga bumoto kay duterte. hindi ito iba sa mga tradisyunal na pulitiko. sa itinatakbo ng mga bagay-bagay, higit pang mas magiging delikado ang mga hakbang nito dahil nakabaon ito sa utang na loob sa mga tao sa likod ng kanyang kampanya at pagkapanalo. bukod sa ngayong makapangyarihan nang muli na mga marcos, nariyan pa ang nagnanais ding muling pumaimbulog na sina gloria macapagal-arroyo at balikod nitong asawa, at maging ang natalong si manny villar. lahat ng ito'y nais na muling kumubra sa bayan at si digong, bilang isang "action star" ay "di bumabali ng sariling salita"… maging ang sambayanan at inang bayan ang nakataya.

kung magagawang dedmahin ni duterte ang mga pang-aabuso ng rehimeng marcos at tuluyang yurakan pang muli ang mga biktima nito, di malayong payagan din nito ang mga buktot na muling maghari.

nanghihilakbot, nanggagalaiti ako sa galit ngunit higit sa lahat, nalulungkot ako sa mga itinatakbo ng mga pangyayari. ngunit gaya rin ng sinabi ko, nawa'y mabagok ang ulo ni digong at baka sakaling magising ito sa katotohanang may magagawa siyang higit na mabuti para sa bansa at hindi rito kasama ang pagbabayad ng utang na loob. sana'y isipin niya ang sambayanan at gamitin ang kamay na bakal at tigas ng mukhang sabihin sa mga tulad nina marcos na "hanggang diyan na lang kayo". sana nga.   

sa ngayon, hahaba na ang pangalan ng pambansang institusyong "libingan ng mga bayani". mula ngayon, ito na ang libingan ng mga bayani at ng isang mandarambong, diktador at mamamatay-tao.

#HindiBayanisiMarcos

#NeverAgain

metro ng tubig

malay ko sa metro na 'yan… ni hindi ko pa nga nakikita 'yan sa tagal ko na sa buena casa. sa totoo lang, ni wala nga akong pakialam sa pagbasa ng metro na 'yan maski sa tingin ko'y higit na mababa pa dapat ang binabayaran ko sa buwanang patak ng metro para sa kunsumo ng tubig.

ni hindi ko mamamalayan kung may kakaiba sa pagtakbo nito. una, wala ito sa  yunit ko. nasa dulo ito ng unang palapag at dahil nasa unang pinto ako, di ko talaga makikitang patuloy ang pagtakbo nito. hindi ako magagawi sa bandang ito, maski pa gusto kong makasagap ng tsismis. pangalawa, matagal na ako sa buena casa, ngayon lamang nangyari ang sinasabi nilang aberya sa metro ng aking tubig. sa marami kong taon dito, naglalaro lamang sa 70-100 pesos ang bayarin ko sa tubig. gaya ng sabi ko, pakiramdam ko nga ay di pa dapat ganito kataas ang binabayaran ko dahil mag-isa lamang ako, di ako naglalaba at wala ako sa bahay halos buong maghapon. pero ok na rin kahit sa tingin ko ay mataas pa rin ito. iniisip ko na lamang na mahirap para sa admin ng building na i-compute ang pang-isahang taong kunsumo. di pa ako nagkakaproblema rito sa loob ng maraming taon. pangatlo, hindi ko na nagagamit ang flush ng indoor dahil sira ito, pati na ang gripo sa lababo. kaya nga dapat mas mababa sa 70 pesos ang bayarin ko. higit sa lahat, mapapansin mo ba talaga kung may pagbabago sa galaw ng tubig? imposible ito at di ko ito pag-aaksayahan ng panahong obserbahan.

kaya nga madiin kong sinabing di ko babayaran ang anumang sosobra sa karaniwan kong kunsumo ng tubig. di ko kagagawan kung bakit nagka-aberya ito. pagbalik ko mula sa singapore, wala akong tubig. at nang ibinalik nila ito, wala naman akong napansing pagbabago. nito ulit nang itawag ni shelda, tsaka ko lamang napansin ang sinasabi nilang pagtakbo ng tubig. muli, di ko ito kasalanan.  tungkulin nilang abatan ang mga metro sa araw-araw. silipin at nang kanilang mapansin ang pagtakbong di ayon sa normalidad. hindi ito responsibilidad ng mga nangungupahan.

mabuti at mahusay ang pakikitungo ni kuya isko nang kanyang ayusin ang sistema sa aking yunit nitong nakaraang sabado. pinalitan ang flush at gripo at naging maayos na ito. kundi dahil dito ay tiyak na magtutuloy-tuloy ang inis ko. mabuti na lamang.

dapat lamang na rin ako papanagutin sa mga pinalitan nilang mga bagay-bagay. dapat lamang nila itong palitan. wag na wag din sanang magpaandar ng atityud. cool lang dapat at sana'y magpatuloy ang mabuting samahan.

fountain

There is a fountain of youth: it is your mind, your talents, the creativity you bring to your life and the lives of people you love. When you learn to tap this source, you will truly have defeated age. – Sophia Loren

A kind heart is a fountain of gladness, making everything in its vicinity freshen into smiles. – Washington Irving

Some people drink from the fountain of knowledge, others just gargle. – Robert Anthony

You must intensify and render continuous by repeatedly presenting with suggestive ideas and mental pictures of the feast of good things, and the flowing fountain, which awaits the successful achievement or attainment of the desires. – Claude M. Bristol

The world is full of abundance and opportunity, but far too many people come to the fountain of life with a sieve instead of a tank car... a teaspoon instead of a steam shovel. They expect little and as a result they get little. – Ben Sweetland

The hours I spend with you I look upon as sort of a perfumed garden, a dim twilight, and a fountain singing to it. You and you alone make me feel that I am alive. Other men it is said have seen angels, but I have seen thee and thou art enough. – George Edward Moore

My two fingers on a typewriter have never connected with my brain. My hand on a pen does. A fountain pen, of course. Ball-point pens are only good for filling out forms on a plane. – Graham Greene

Water from the white fountain didn't taste any better than from the black fountain. – B. B. King

I discovered something amazing, which has caused a lot of controversy - the fountain of youth. I have to keep it a secret! – David Copperfield

Malapascua

Focus on this moment. 
Hold your hand and see what it feels like. 
Go to the beach. 
Talk to a tree.

Malapascua Island.
Daanbantayan, Cebu.
Sometime ago. 

Bimmapor white

Like a movie that burns in the projector while you're watching it, a bloom of hot and perfect whitness spread out before me and swallowed everything. 

- Miss Peregrine's Home for Peculiar Children

Bimmapor Rock
Nagtipunan, Nueva Vizcaya
June 2016

giving journal

tis great! yes, CBTL's 2017 giving journal is here! i can't wait to have my companion for a great 2017. :)

Begin your giving journey with our Giving Journal 2017.

Find inspiration in every page to brew your best year yet by becoming the best version of yourself, by making a positive difference in the world, and living a life full of love and service for others.

Collecting of stamps for the Giving Journal will begin October 22, Saturday, in all The Coffee Bean & Tea Leaf® stores. Available in 4 colors rose, purple, turquoise, and grey. All it takes is 12 stamps to redeem your own! 

malaise

minsan mas ok pa 'yung may sipon o ubo ka eh. sisinga ka lang o uubo para lumabas ang sipon o plema, iinom ng maraming tubig, magpapahinga at mag-ooverdose sa vitamin c ay magiging ok na ang pakiramdam. pero iba ang kalagayan kapag impeksyong bunga ng baktirya ang kalaban. masasakit ang mga kalamnan at kasu-kasuan at tila ba may mabigat na nakadagan sa iyong buong katawan at damang-dama mo ang karamdamang pilit pa ring nilalabanan ng iyong mga antibodies.

at ito nga ang lumukob sa aking katawan nitong buong dalawang linggong nakalipas. may panginginig sa iyong buong katawan, mahina ang iyong pakiramdam at malaise ang kabuuan nito. ni hindi mo nais kumilos dahil ang gusto ko lamang ay humiga at baluktutin ang aking mga paa para maibsan ang sakit ng kasu-kasuan. ninanais mong laging pawisan dahil nakababawas ito ng sakit. pero siyempre nandiyan pa ang matinding sakit ng ulo na tila bumibiyak dito sa dalawa. isang klasikong pagdalaw ni migraine. mas matindi ang sakit ng ulo  kapag umiinom ng matinding antibiotic.

natapos ko nga 'yung antibiotic at umokey naman ang pakiramdam. pero nitong nakaraang simula ng linggo, tila bumabalik ulit ang impeksyon. dali-dali ulit akong pumunta sa healthway para magpatingin, hindi sa GP, kundi sa ispesyalista na sa ENT. sobrang haba ng pila at umabot ng mahigit isang oras ang paghihintay. sinabi lamang ng duktor na bahagi talaga ng impeksyon ang sakit ng kasu-kasuan. din a raw ang bibigyang ng bagong gamot dahil natapos ko naman ang antibiotics. ang gagawin daw niya ay ikukultura ang baktirya sa aking lalamunan at pag-aaralan ito bago magbigay ng bagong gamot. swab at maghihintay ng 5-7 araw bago malaman ang resulta at saka lamang babalik sa klinika. ang tangi niyang nireseta ay imunomax forte para raw palakasin ang aking immune system at panglaban sa sakit at anumang impeksyon. isang kapsula kada araw.

mahirap ang maysakit. mahirap ang araw-araw na aktibidades kapag may pisikal na dinaramdam. nawa'y tuluyan nang lumisan ang impeksyon at magbalik ang dating sigla. kailangan natin ito.       

Nagtipunan Highway

All roads lead to adventure. 

Nagtipunan Valley, Nagtipunan, Nueva Vizcaya.
June 2016.

Baguio City

... between two pines is a window to a new world.

Baguio City, June 2016.

stolen

This should have been a stolen shot... not a paparazzi shot since the subject isn't a celebrity. It was just a perfect frame - big tree, greens, a little of modern housing and perfect skies and clouds... until the subject turned to look at us! #laughtrip

Singapore, October 2016.

Barili

Asking too many questions is an affliction. 
- Frank McCourt, Angela's Ashes

Barili, Cebu,
September 2016.

Singapore

When weekend is just around the corner but you're not feeling well. 

Singapore,
October 2016.

ngitngit

bakit ba kasi masyadong matindi ang galit ng isang ito sa mundo? ano na naman kayang mabagsik na asido ang naisaboy nito sa sarili at ganito na naman ang pagnanaknak? paanong sa isang iglap ay biglang nanumbalik ang pait at lumukob na muli sa kanyang kabuuan?

nais na lamang isipin ng marami na may ipinagdaramdam itong matinding sakit ng katawan. 'yung matinding sakit ng ulo o ngiping talaga namang mamumura mo kung sinumang kumausap sa iyo. ito ay upang maunawaan ang walang kaabug-abog na pagbabago. di kasi maubos maisip ng marami, bakit ba puno ng ngitngit ang kanyang puso?

dahil ba sa kanyang mga "idolo" na mga multo ng kahapon? dahil ba sa kawalan ng kaututang-dila sa buong maghapon? o dahil ba sa ibang mga rason? anu't anuman… di mababatid kung ano mga makatwirang rason mayroon siya. masuwerte kasi ito. kaya kung tutuusin, wala itong anupamang dapat ikapait sa buhay.

o dahil sa walang ikapapait sa buhay kaya sadya itong gumagawa ng mga isyu upang may mapaglibangan? sabagay, sabi nga ng matatanda, ang isip at katawang masyadong komportable ay dagling dadawagin ng halina ng kabalintunaan. ang di gaanong pagal na katawan bunga ng kawalan ng mabibigat na trabaho sa araw-araw ay sasaputan ng poot. ang di pag-iisip sa kung anong kakainin sa araw-araw ay magtutulak sa maykatawang mag-isip ng kung anu-ano… maging ng mga bagay na walang kapararakan.

nawa'y masumpungan mo ang tamang ihip ng hangin. nawa'y manatili ito sa iyo sa mahabang panahon. sana'y mawala ang anumang dawag at sapot sa iyong puso't isipan nang maging maliwanag ang mga bagay-bagay sa iyong perspektibo.

di pa naman huli ang lahat. sana'y mahanap mong muli ang iyong sarili.