ang biktima

ay sus! ang "inapi at patuloy na inaapi" ay heto na naman sa kanyang katangi-tanging palabas. kagila-gilalas, kamangha-mangha at talaga namang puno ito ng pait, pagmamataas at katunggakan ng pag-uugali.

kumbinsido na talaga ako. sa pagsapit ng tag-ulan, simula na ng kadiliman ng mula rito. sa tuwing mamumuo ang masamang panahon sa banda ng dagat pasipiko, siya na ring simula ng panggagaliti nito, kapara ng mabilis na pag-ikot ng malalakas na hanging magdadala ng ulan. sa sandaling magdala ng pag-uulan ang habagat, heto na naman ang di na natapos na isyu mula sa kanyang pusali. kapag nagsisimula na ang pagbaha sa maraming lugar sa luzon, masama na ulit ang birada nito sa mga tao sa iyong paligid… ay hindi pala sa lahat, sa iilang mga indibidwal lamang, 'yung sa tingin nito ay may utang na loob sa kanya.  

naitanong na kaya nito sa kanyang sarili kung bakit lagi siyang nasa gitna ng awayan, samaan ng loob at paghihiwa-hiwalay ng mga magkakaugnay? sumingit man lang ba maski minsan sa kanyang kukote na usisain ang sarili, magmuni-muni kung ano ang mali sa kanyang sarili? sa kanyang gabi-gabing paghimbing, sumagi man lang ba sa kanyang isip na baka siya ang problema kaya't sa maraming pagkakaton sa loob ng maraming taon, lagi itong may nakakasamaan ng loob? di kaya ito nagtataka kung bakit tila karaniwan na ang pagkakaroon nito ng bagong kagalit o katampuhan o kaaway?

bakit ba kasi pakiramdam mo ay kinakalaban ka ng iba? bakit lagi mong pinangangalandakang tama ka at mali ang iba? bakit pakiramdam mo ay may karapatan kang magmataas? bakit buong pahimakas mong dinidemanda na umayon sa iyo ang lahat? bakit? hindi ka ba talaga napapagod sa iyong gawa-gawang mga hilahil?

nais ng maraming unawain ang iyong disposisyon. pero hindi ito sa lahat ng pagkakataon. tandaan mo, lahat ay may hangganan. 'ika nga, ang pasensya ay nauubos din. sige ka, baka di makapagpigil ang iba, baka ibuhos sa iyo ang galit at di mo kayanin kapag winasak ka ng mga masasakit na salita mula sa mga ito! di ba nga, minsan mo nang hindi kinaya? kapag napuno na ang salop, baka lalong di mo kayanin ang pagtutulad sa iyo sa mga mabalasik na personalidad na iyong kinamumuhian! ito na yata ang isa sa pinakamasakit na maaaring sabihin sa iyo dahil muhing-muhi ka sa mga ito pero tila nagiging ikaw na ang mga ito base sa iyong inaasal at iginagawi nitong mga nakaraang panahon.

iyong pakatandaan, hindi ka ispesyal, hindi lang ikaw ang anak ng diyos at hindi mo dapat pagmataasan ang iba, maski pa naungutan ka ng mga ito magkaminsan. hindi porke may utang na loob sa iyo, kailangan ka na nilang ilagay sa pedestal at ipagbunying parang isang bayani. hindi maaaring ipilit na ikaw ang ayunan, intindihin at bigyan ng atensyon. wala kang monopoliya sa pagiging tama… sa totoo lang, maraming beses ka nang pumalpak. huwag na bastos ang pagsasalita kahit pa may punto ka, anumang mabuti kapag sinabi ng pabalagbag ay nagiging masama at umaasim. tanggapin mong sa bawat gulo o awayang iyong kinasangkutan, may mali ka rin sa mga ito at sa mga sitwasyong ito, anumang sinabi o ginawa mo, maaaring reaksyon lamang ng ibang partido ang ikinasama mo ng loob. at saka, walang umaapi sa iyo. ikaw nga itong nagmamalabis.

hindi puwedeng laging tungkol sa iyo, hindi lang ikaw ang karakter sa mundong ibabaw. sana'y maunawaan mong ang lahat ay nasa gitna ng ibang porma ng unos, ang iba nga ay may mas matinding pinagdaraanan. kung wala kang matinding suliranin, itigil mo ang kangunguynguy, pagpapabrika ng mga isyu, paglalagay ng malisya sa mga bagay-bagay at pag-akap sa mga negatibong asersyon. huwag mong hayaang tuluyan kang ulaulin ng balighong emosyon.

dapat kang matuto sa kamalian ng iyong mga kinamumuhian at iwasan ang mga ito. di tulad nila, may panahon ka pa upang baguhin ang iyong sarili. gusto ng marami na muli mong matagpuan ang iyong dating sarili… 'yung walang dawag ang emosyon, 'yung walang bahid ng malisya ang bawat salita, 'yung walang pagmamataas sa bawat gawi, 'yung walang pangungunsensya, 'yung walang kabalintunaan, 'yung walang dramang pabiktima, 'yung dating magiliw at puno ng positibong pagtingin sa mga bagay, 'yung dating ikaw.