pablo at RH

baligho at ganap na ridikulo ang pag-iisip ng ilang kasapi ng kapariang katoliko. maging ang kalamidad sa mindanao dala ng bagyong pablo ay iugnay ba naman sa nagaganap na debate tungkol sa RH bill! naganap daw ang delubyong kumitil sa buhay ng di bababa sa 400 sa iba’t ibang mga lalawigan sa mindanao dahil pagsusulong ng mga maka-RH na ipasa na ang nasabing panukalang batas sa kamara’t senado bago matapos ang disyembre. ano kayang uri ng lohika o doktrina ang pinaiiral ng mga iresponsableng mga paring ito?

katoliko ako. magmula nang lumipat ako sa san antonio, naging madalas na rin ang pagsisimba ko tuwing linggo sa parokya ng banal na puso ni hesus. may mga ilang pari na rin ang nangahas na tumalakay sa usaping RH pero sa tuwing magaganap ito, di ko maiwasang mapabuntung-hininga at hilingin sa Diyos na sana’y matapos na ang homiliya ng pari. para sa akin, hindi ang pulpito ang tamang entablado upang magsulong ng pulitikal na paninindigan ng simbahan. kung nais nilang makialam at panatilihin ang kanilang impluwensya sa sayki ng mga pinoy, lumitaw na lang sila sa mga programang pandebate sa telebisyon at radio. nauunawaan ko ang kanilang paninindigan at ang hangaring manatiling makabuluhang institusyon sa lipunang pilipino. ngunit ang humabi ng mga kabaliwan at salungat sa katwiran ay patunay lamang ng pagiging desperado’t walang kapanagutan sa mga kapwa-pilipino, lalo na sa mga nasalanta ng bagyo. kaysa bumalik sa paurong na pananakot tungkol sa “parusa” ng Diyos tulad ng ginawa ng mga prayle noong panahon ng mga espanyol, bakit hindi na lang nila ituon ang atensyon sa pagtulong sa mga nawalan ng bahay at ari-arian at mga nangamatayan? anu’t anuman, ang simbahan ang isa sa may pinakamalalim na kaban sa maraming institusyong panlipunan.

ang delubyong naganap sa mindanao sanhi ng bagyong pablo ay bahagi ng makabagong suliraning dala ng pagbabago ng klima. ang mga nasawi’t matinding pinsala sa mga ari-arian ay dala ng walang habas na paglapastangan ng tao sa kalikasan, lalung lalo na sa kagubatan. hindi ito bunga ng anumang bagsik ng Maykapal or parusa sa mga taong wala namang direktang kinalaman sa nagaganap na debate at pagmamani-obra ng mga maka-RH sa senado’t kamara. bumalik sa kaibuturan ng usapin, makipagdayalogo at tumigil na sana sa pagbibitiw ng mga iresponsableng hirit ang ilang mga pari.