sa 'yo lamang

madali ngang mahulaan ang sa 'yo lamang ni laurice guillen. masayang pamilyang sinira ng pangangaliwa… muling bumalik ang amang nang-iwan at sumambulat ang lahat ng isyu sa pagitan ng lahat. at siyempre, mananaig ang kapatawaran at happy ending din ito. prediktable at di na kailangan pang mag-isip ng sinuman. simple at gaya ng maraming pelikulang pinoy, pinansitan ito ng mga eksenang araw-araw mong matutunghayan sa mga teleserye. 'yun na nga siguro ang isang malaking problema ng pelikulang pinoy ngayon dahil sa araw-araw, isang dosena o higit pa ang mga teleseryeng dati nang nagreresaykel sa tema ng sa 'yo lamang. kaya wala nang bago. wala nang sorpresa sa konsepto nito.

isang malaking problema ng pelikula ay nagsimula ito sa paghahanap ng behikulo para sa ilang malalaking pangalan sa bakuran ng abs-cbn. ok naman si bea alonzo, nakakarte naman. pero masyado itong nakakahon, wala nang ginawa kundi magalit at laging nakaangil, 'yung angil na pangteleserye ulit. maski sa mga sandaling nagpapakita ng kanyang karupukan ay mahirap makagaanan ng loob o matanggap ang kanyang diane. puno siya ng galit sa kanyang ama, nandoon na tayo. pero masaya naman ang kanilang pamilya kahit ganoon ang nangyari di ba? kaya dapat ay nagkaroon ito ng ibang dimensyon bukod sa kanyang pagiging istrikto. mahirap ding ma-imagine na mas matanda siya kay coco martin pero siyempre kailangang ipilit ito dahil para nga kay bea ang proyekto. oo nga't sa totoong buhay ay may isang naiiba sa magkakapatid pero sobrang layo ng coby ni coco sa mga kapatid nito. para itong asong inampon lang at maniniwala pa akong siya ang naging anak ni amanda (lorna tolentino) na lumaki sa ibang tahanan. mahusay na aktor si coco pero dito, labis-labis ang kanyang poot… para siguro tapatan ang angil ni bea! siyempre kailangan ding bigyang panahon ang pagsuporta ni diether ocampo kahit di naman talaga kailangang ganoon karami ang kanyang eksena.

may mga punto ring di natahi nang maayos. una na riyan ang bigla-biglang pagtanggap ni coco kay shaina magdayao gayong kulang na lang ay tadyakan niya ito nang patirahin ni lorna sa kanilang bahay. dahil ba sa presyur ng nagkakagulong pamilya kaya bigla na lang ding bumagsak ang mga grado ng karakter ni enchong dee? o di rin talaga siya magaling na estudyante at umaasa sa kanyang pagiging varsity player kaya nagkaroon ng scholarship. bukod dito, maraming negatibong palaisipan ang iiwan ng pelikula sa iyo. kailangan ba talagang maski si miles ocampo ay may kauuwiang ka-loveteam sa huling eksena? o bakit ganoon na lamang ang laki ng impluwensya ng pari (dominic ochoa) sa pamilya? maraming eksenang tila isiningit lang pero di talaga kailangan tulad ng flashback nina lorna at christopher de leon o mga eksena ni enchong at lauren young.

ang nagsilbing tagapagligtas ng sa 'yo lamang mula sa tuluyang pagiging palpak nito ay si lorna tolentino at ang simpleng mensahe nito. ang tahimik na presensya ng amanda ni lorna tolentino ang nagsilbing angkla ng istorya. matatag sa kabila ng tila pagiging bakgrawnd lamang sa kagaspangan ni bea lalo na sa unang kalahati ng pelikula. kahit na nga gusto niyang maging bida-kontrabida paminsan-minsan, ang mga ganitong papel ang tunay na forte ni lorna. siya rin ang may pinakamagandang character sketch dahil na rin siguro si amanda naman talaga ang sentro ng pelikula, hindi si diane. tamang timpla ang ibinigay ni lorna bilang isang nagdurusang maybahay pero may lihim din palang pagkakamali. sa kanya ang karakter na katanggap-tanggap.

sa haba ng sa 'yo lamang, ang mensahe talaga nito ay simple lang. ang kamatayan ay bahagi ng buhay at di maiiwasan. pagtanggap at pagpapatawad ay mahirap ibigay ngunit ang lahat ay nakakamit sa tamang panahon. walang imposible lalo na nga kung nasa sentro ang pananampalataya sa anumang porma nito.

may panghihinayang dahil produkto ito ni laurice guillen pero ok na rin na pampalipas-oras habang naglilinis ka ng bahay.