doy's inasal

una kong natuklasan ang malinamnam na imbensyong ito nang ang dodoy’s inasal ay nasa kahabaan pa ng kamagong. malapit ito sa barbershop ni kuya jerry kung saan ako nagpapakalbo kaya naman kada bagong tabas, siguradong mapapadaan ako rito para kumain at magalak sa kanilang manok na inasal.

pagkaraan ng ilang taon, nagsara ang dodoy’s. binili yata ang lupang tinitirikan nito. lumipat sila sa pablo ocampo extension, malapit sa kanto ng sampaloc. at dito natuloy ang aking love affair sa kanilang chicken inasal!

kaiba sa inasal ng mang inasal, ang manok nila rito ay malinamnam, malambot, hindi tuyo, malalasahan mo ang tamang pagmarinado sa manok bago pa ito isalang sa uling upang ihawin. di rin gaya ng sa mang inasal, gumagamit pa rin sila ng tradisyunal na pag-iihaw sa ibabaw ng uling kaya’t sumasarap lalo ang bawat pecho o paa na ihahain sa iyo. sinamahan pa ito ng masarap at mainit na sabaw, malamig at sakto ang tamis na kanilang iced tea, at siyempre ang nagdadagdag ng swak na swak na lasa’t panghalina, ang toyo, kalamansi at sili!

di ako nagtataka kung bakit sa halos isang beses kong pagdalaw sa doy’s ay lagging maraming tao. sa wikend, madalas ay maghihintay ka ng mesa bago makakain. buti sa akin, di ko pa naman kinailangang umupo sa labas para kumain. 

nabitbit ko na rin ang aking pamilya para kumain sa doy's. lahat sila ay sang-ayon sa sarap at linamnam ng manok na inasal dito. dumadayo pa nga mula sa pasig at novaliches ang iba sa amin! di na tuloy ako makapaghintay na bumalik dito at kumain ng inasal, namit gid!