duterte

tanggap ko ang panalo at pag-upo ni rodrigo duterte bilang susunod na pangulo ng pilipinas. di ko siya binoto pero panahon na nga upang makipagtulungan at suportahan ang sana'y mabubuting mga gagawin ng bagong presidente.

di niya nakuha ang aking boto sa maraming rason. una riyan ang  kawalan nito ng malinaw na plano sa ekonomiya at edukasyon. sang-ayon akong kailangang linisin ang lipunan sa pamamagitan ng kamay na bakal na pagpapatupad ng batas at maayos na pagliligpit sa mga wala na talagang balak gumawa ng mabuti. ngunit ang panguluhan ay ibang usapan, malayo ito sa maliit na sakop ng pamumuno sa isang lokal na yunit ng gobyerno. ang pagiging pangulo ay humihingi ng komprehensibong plano, matamang pagsisiyasat at di bara-barang gawi. sayang ang mga nasimulan ng administrasyong aquino sa paglago ng ekonomiya at paglaban sa katiwalian kung di magpaplano ng mahusay ang susunod na administrasyon. pangalawa, di ko nakitaan ng anumang bahid ng lamak ang gawi at pinagsasabi ni duterte sa kabuuan ng kampanya. puro biradang magpapatimbwang sa kalaban ang sinabi nito sa mga debate… ito ang mga pampopulistang hirit na nagpalapit sa kanya sa masa. hindi biro ang usaping pambansa kaya di ito dapat gawing biro at idaan sa mga biradang gustong-gusto ng kanyang mga tagasuporta. tila di naman siya seryoso dahil nga di naman di niya rin inakalang mananalo siya. at pangatlo, bunga ng inspirasyong pang-action star ni duterte, dumami ang walang galang lalo na sa social media. dahil nga sa ehemplong pangkalye at di masyadong naglilimi-limi, lalong dumami ang basher sa social media. tila binigyang-sindi nito ang pagdanak ng maruming lenggwahe at pambabastos ng marami maging ang mga maituturing na modereyt. sabi nga ng isang taxi driver, maraming bata sa loob lamang ng isang taon ay naging pabalang na kung sumagot. sa social media o anumang huntahan, lalong naglipana ang mga hirit na wala sa hulog at di naman talaga tumatalakay sa mga isyu. "kung ayaw mo, eh di barilin mo!; di ka pinipilit, p#*@^* @$^ naman o!" pinalakas ng kampanya ni duterte ang maling pagtingin ng mga pilipino sa pulitika – di mo kailangang tumalakay ng isyu, bigyan mo lamang sila ng mga one-liner hirit at magpokus ka sa showmanship, magtapon ng nakatatawang mga hirit magkaminsan, ok ka na.

  

sangkaterba na ang nagtatanggol sa kanya na di daw dapat iturong akawntabol ang higit 15 milyong bumoto kay duterte sa sandaling dumanak ang dugo sa pilipinas o pumalpak ang kabuhayan ng bansa o kung anumang kapalpakan ang mangyari. mahaba-haba ang pagtatalo rito sa facebook pero para sa akin, walang dapat ikabahala ang mga bumoto kay duterte tungkol dito. buong pahimakas nilang idineklara sa anumang porma ang pagsuporta kay mayor digong. kung positibo silang may magagawa nga ang higit dalawang dekada nang alkalde ng lungsod ng davao para sa pilipinas, di rin dapat mangimi sa pagtayo sa kanilang pinili. siyempre, sila ang nagluklok dito, may pananagutan sila sa kabuuan ng 60% ng populasyong di sumuporta kay duterte. naroon na tayo, iginagalang ang hatol ng nakararami… demokrasya nga kasi. pero di ito iba sa paninisi kay noynoy na maski yata init ng panahon ay nasisi na sa kanya.

nais kong magtagumpay si duterte sa kanyang mga mabubuting adhikain. tagumpay ito ng buong bansa kung saka-sakali, lalo na sa pagsasaayos ng kapulisan at kasundaluhan para sa kapayapaan at kaayusan. lalong magiging kaaya-aya ang bansa sa mga mamumuhunan. ngunit kaakibat nito ay mas higit na pangangailangang bantayan ang kanyang bawat galaw. dahil nga harabas ang kanyang istilo, mataas ang prababilidad na magbitiw ito ng mga pananalitang di dapat o kumilos na di ayon sa batas at proseso. kailangang suriin ang kanyang bawat desisyon, lalo na kung tunay talaga itong pambansa o dahil magbabayad na rin siya ng utang na loob sa mga taong tumustos sa kanyang kampanya. di pa batid ng marami pero marami ang bali-balitang ang grupo ni gloria macapagal-arroyo ang namuhunan kay duterte. ang unang signal nito ay base sa kung sinu-sino ang iuupo niya bilang miyembro ng kanyang gabinete. sabi niya, iuupo niya ang pinakamahuhusay lalo na sa larangan ng ekonomiya at pananalapi at itutuloy ang mga magandang ginawa ni aquino. ang biro nga niya ay kokopyahin niya ang mga plano ng mga nakatunggaling sina mar roxas at grace poe para sa ekonomiya.

magkakaalaman din naman sa paglakad ng panahon, bibigyan ko siya ng pagkakataon at ako'y naghihintay na masurpresa sa mga mabuting maaaring idulot ng bagong presidente rodrigo duterte.

magandang buhay, pilipinas!