flyover

minsan isang gabi

pauwi mula sa bidyisi

sakay ng uber na malataksi

habang naiipit sa trapikong mabigat

nag-aagaw ang araw at gabing marapat

sa ibabaw ng flyover na malapatapat

sumagi sa isip ang mga mahal

dumaiti ang kanilang mga mukhang mariringal

sumuot sa puso ang pag-ibig nilang pampawi sa katawang pagal

humayo na ang aming mga magulang

tinawag na sa kaharian ng maylalang

baon ang aming pag-ibig at parati silang nariyan lamang

buo kaming anim na magkakapatid

kasama si tita jo at sampu ng aking mga pamangkin na tuwa’y hatid

nagsipaglakihan na’t sa pagdaan ng panaho’y lalong tumitikid

paminsan-minsan may sulirani’t di pagkakaunawaan

dumarating ang mga araw na may tampuhan

o karaniwang pagdaramdam na mangilan-ngilan

sa huli, kami pa rin ang anim ni judith at roberto

pinagbigkis ng pag-ibig na hinulma ng tamang timpla’t panuto

magkakadugtong ang pusod, kapatid at kapatid, sandaang porsyento

dumaan man ang hilahil at maipa man ang palay

walang anuman ang sa amin ay makapaghihiwalay

mananatiling matingkad ang pag-ibig mula sa bawat isa’y sumisilay

dalangin sa maykapal ang bawat isa’y tuwinang ipag-adya

ilayo sa anumang kapahamakan at makamit ang ikasisiya

nawa’y pagpalain ang aming bagong taong nagbabadya

sa gitna ng trapik na tila di na gumalaw

nakatatawang may luhang dala ng tuwa ng mag-anak ang sumungaw

napahunta tuloy sa drayber tungkol sa buhay pamilya at mga sabaw!